Kudumisha amani: Wanariadha wajifua kwa Mvomero Half Marathon

Anthony Mtaka/DC Mvomero na waziri Nyalandu

WANARIADHA mkoani hapa wameanza mazoezi kujiandaa na mbio za nusu Marathon za Mvomero ‘Mvomero Half Marathon’ yanayotarajiwa kufanyika Januari 12, 2013.

Wakizungumza na Tanznia Daima kwa nyakati tofauti, baadhi ya wanariadha hao walisema wameanza mazoezi mapema kwa lengo la kujiweka fiti zaidi ili kufanya vizuri kwenye mashindano hayo.

Thobias Mkude ambaye ni miongoni mwa wanariadha chipukizi katika mbio hizo, alisema amekuwa akijifua asubuhi na jioni kwa lengo la kufanya vizuri kuuwakilisha vema mkoa wake.

“Nimeshaanza mazoezi asubuhi na jioni, lengo langu nataka kuipeperusha vema bendera ya mkoa wa Morogoro katika mashindano hayo,” alisema Mkude kuelekea mbio hizo ambazo uwepo wake ni kuibua vipaji.

Kwa mujibu wa waratibu, mbali ya vipaji mbio hizo zinafanyika kudumisha umoja na mshikamano miongoni mwa jamii ya wafugaji na wakulima ambao mara kadhaa wamekuwa wakiingia kwenye mapigano kutokana na mifugo na ardhi.

Source: Tanzania Daima